श्री लक्ष्मीकेशव देव प्रसन्न

प्रस्तुत श्री विष्णूचे देवस्थान कोकणातील रत्नागिरी जिल्ह्यातील श्री गणपतीपुळे या प्रसिद्ध तीर्थक्षेत्रापासून २१ कि. मी. अंतरावरील कोळिसरे गावात आहे. मंदिरातील मूर्ती अखंड काळ्या पाषाणाची असून मूर्तीची उंची ५ फूट, ५ इंच व रुंदी २७ इंच इतकी आहे. मध्ययुगात ,कोल्हापूर येथील रंकाळा तलावात ही श्रींची मूर्ती पाण्यात सुरक्षेच्या दृष्टीने ठेवली गेली होती. कालांतराने कोणा एका सज्जनास ती श्रींची मूर्ती तेथून दुसरीकडे स्थापित करण्याकरिता स्वप्नात दृष्टांत झाला. त्यानुसार मूर्ती रंकाळ्याहून कोकणात नेत असताना कोळिसरे या ठिकाणी स्थापित झाली. अशी आख्यायिका आहे.

मंदिराच्या परिसरात श्री रत्नेश्वर आणि श्री हनुमान यांची सुंदर मंदिरे आहेत . मंदिराच्या सभोवतालच्या परिसरात असलेली घनदाट हिरवी झाडी आणि अखंड वाहणारा पाण्याचा झरा (तीर्थ ) परिसर रम्य करतात . शांत, शुद्ध आणि रम्य अश्या या ठिकाणी दैवी शक्ती आणि निसर्ग यांचा मेळ पाहून मन आनंदमय होऊन जात. आत्मिक सुखाची जणू प्रचितीच मिळते .